ദുബൈ:വാടക ഒരുമിച്ച് വലിയ തുകയായി നൽകേണ്ടിവരുന്ന ബുദ്ധിമുട്ടിന് പരിഹാരമായി ദുബൈയിൽ ‘റെന്റ് നൗ, പേ ലേറ്റർ’ സേവനം ആരംഭിക്കുന്നു. ദുബൈ ലാൻഡ് ഡിപ്പാർട്ട്മെന്റ് (DLD) ഒരു പ്രാദേശിക ബാങ്കുമായി സഹകരിച്ച് സെപ്റ്റംബർ മുതൽ പദ്ധതി നടപ്പാക്കും. ഇതിലൂടെ വാർഷിക വാടക 12 മാസത്തേക്ക് പലിശയില്ലാതെ തവണകളായി അടയ്ക്കാൻ വാടകക്കാർക്ക് സാധിക്കും.
പദ്ധതി പ്രകാരം വാടകക്കാരൻ വീട് തിരഞ്ഞെടുക്കുകയും കരാറിൽ ഏർപ്പെടുകയും ചെയ്താൽ, പങ്കാളി ബാങ്ക് കെട്ടിട ഉടമയ്ക്ക് ഒരു വർഷത്തെ മുഴുവൻ വാടകയും മുൻകൂറായി നൽകും. തുടർന്ന് വാടകക്കാരൻ ബാങ്കിന് ഈ തുക പലിശയില്ലാതെ 12 മാസത്തോളമുള്ള ഗഡുക്കളായി തിരിച്ചടച്ചാൽ മതിയാകും. റിയൽ എസ്റ്റേറ്റ് വാടക വിപണിയിൽ ഇത്തരമൊരു സംവിധാനം സംയോജിപ്പിച്ച് നടപ്പാക്കുന്ന ലോകത്തിലെ ആദ്യ നഗരമായി ഇതോടെ ദുബൈ മാറും.
പദ്ധതിയുടെ യോഗ്യതാ മാനദണ്ഡങ്ങൾ, അപേക്ഷാ നടപടിക്രമം, തിരിച്ചടവിന്റെ നിബന്ധനകൾ തുടങ്ങിയ വിശദാംശങ്ങൾ സേവനം ഔദ്യോഗികമായി ആരംഭിക്കുന്നതോടെ പ്രഖ്യാപിക്കും. ജൂൺ 23ന് DLD ആരംഭിച്ച ‘ഫ്ലെക്സി റെന്റ്’ പദ്ധതിയുടെ തുടർച്ചയായാണ് പുതിയ സംവിധാനം വരുന്നത്. ഫ്ലെക്സി റെന്റിലൂടെ വാടക മാസത്തിലോ മൂന്ന് മാസത്തിലോ ആറ് മാസത്തിലോ അടയ്ക്കാനുള്ള സൗകര്യം നേരത്തെ ഒരുക്കിയിരുന്നു.
No comments:
Post a Comment