ബയോമെട്രിക് തിരിച്ചറിയൽ സംവിധാനങ്ങൾ വ്യാപകമാകുന്നതോടെ പാസ്‌പോർട്ടില്ലാത്ത യാത്ര സാധ്യമായേക്കുമെന്ന് പോൾ ഗ്രിഫിത്ത്‌സ്
ദുബായ്: അടുത്ത അഞ്ചുവർഷത്തിനുള്ളിൽ അച്ചടിച്ച പാസ്‌പോർട്ടുകളുടെ ആവശ്യം ഇല്ലാതായേക്കുമെന്ന് ദുബായ് എയർപോർട്ട് സിഇഒ പോൾ ഗ്രിഫിത്ത്‌സ്. ബയോമെട്രിക് സാങ്കേതികവിദ്യയും ഡിജിറ്റൽ തിരിച്ചറിയൽ സംവിധാനങ്ങളും വ്യാപകമാകുന്നതോടെ രാജ്യാന്തര യാത്രാരംഗത്ത് വലിയ മാറ്റങ്ങളുണ്ടാകുമെന്നാണ് അദ്ദേഹത്തിന്റെ പ്രവചനം. വിമാനത്താവളങ്ങളിൽ യാത്രക്കാരുടെ ബയോമെട്രിക് വിവരങ്ങൾ ഉപയോഗിക്കുന്നുണ്ടെങ്കിലും നിലവിൽ രാജ്യാന്തര യാത്രയ്ക്ക് പാസ്‌പോർട്ട് നിർബന്ധമാണ്.
രാജ്യങ്ങളും ഭരണകൂടങ്ങളും വ്യക്തികളുടെ ഡിജിറ്റൽ ഐഡന്റിറ്റിക്ക് ഔദ്യോഗിക അംഗീകാരം നൽകുന്നതോടെ പാസ്‌പോർട്ടുകളെ ആശ്രയിക്കേണ്ട സാഹചര്യം മാറുമെന്നാണ് അദ്ദേഹത്തിന്റെ വിലയിരുത്തൽ. വിമാനക്കമ്പനികളും രാജ്യങ്ങളും ഡിജിറ്റൽ തിരിച്ചറിയൽ രേഖകൾക്ക് പൊതുവായ അംഗീകാരം നൽകുന്നതോടെ യാത്രക്കാർക്ക് പാസ്‌പോർട്ട് കൈവശം കരുതാതെ തന്നെ രാജ്യാന്തര യാത്ര നടത്താൻ സാധിച്ചേക്കും. പാസ്‌പോർട്ടുകൾക്ക് നിശ്ചിത കാലാവധിയുണ്ടെങ്കിലും ബയോമെട്രിക് വിവരങ്ങൾ അതേ രീതിയിൽ കാലാവധി അവസാനിക്കുന്ന രേഖകളല്ലെന്നും അദ്ദേഹം ചൂണ്ടിക്കാട്ടി.
അതേസമയം, ദുബായിലെ അൽ മക്തൂം രാജ്യാന്തര വിമാനത്താവളത്തിന്റെ ആദ്യഘട്ടം 2032ൽ പൂർത്തിയാക്കി പ്രവർത്തനം ആരംഭിക്കുമെന്നും പോൾ ഗ്രിഫിത്ത്‌സ് അറിയിച്ചു. നിലവിൽ പാസ്‌പോർട്ടില്ലാതെ ലോകമെമ്പാടും യാത്ര ചെയ്യാനുള്ള സംവിധാനം നിലവിലില്ലെന്നും അദ്ദേഹം മുന്നോട്ടുവെച്ചത് ഭാവിയെക്കുറിച്ചുള്ള പ്രവചനമാണെന്നും ശ്രദ്ധിക്കേണ്ടതാണ്.
No comments:
Post a Comment