പുതിയ ഫെഡറൽ നിയമം ജനുവരി 1 മുതൽ പ്രാബല്യത്തിൽ; വാടക കമ്പനികൾ ഏകീകൃത ഇലക്ട്രോണിക് പ്ലാറ്റ്‌ഫോമിൽ രജിസ്റ്റർ ചെയ്യണം.
ദുബായ്: 2027 ജനുവരി 1 മുതൽ യുഎഇയിലെ കാർ വാടക കമ്പനികൾ വാടകയ്ക്ക് നൽകുന്ന എല്ലാ വാഹനങ്ങളിലും അംഗീകൃത ട്രാക്കിംഗ് ഉപകരണങ്ങൾ സ്ഥാപിക്കണം. കൂടാതെ, ആഭ്യന്തര മന്ത്രാലയവും ബന്ധപ്പെട്ട ലൈസൻസിംഗ് അതോറിറ്റിയും അംഗീകരിച്ച ഏകീകൃത ഇലക്ട്രോണിക് പ്ലാറ്റ്‌ഫോമിൽ വാഹനങ്ങൾ രജിസ്റ്റർ ചെയ്യുകയും സബ്‌സ്‌ക്രൈബ് ചെയ്യുകയും വേണം. റോഡ് ഗതാഗതവുമായി ബന്ധപ്പെട്ട 2024-ലെ ഫെഡറൽ ഡിക്രി നിയമം നമ്പർ 14-ന്റെ എക്സിക്യൂട്ടീവ് ചട്ടങ്ങൾ ഉൾപ്പെടുത്തിയ 2026-ലെ കാബിനറ്റ് തീരുമാനം നമ്പർ 174 പ്രകാരമാണ് പുതിയ നിർദേശങ്ങൾ. വാടക കാർ ബിസിനസ് നടത്താൻ ബന്ധപ്പെട്ട ലൈസൻസിംഗ് അതോറിറ്റിയുടെ പെർമിറ്റും സാധുവായ വാണിജ്യ ലൈസൻസും നിർബന്ധമാണ്. അംഗീകൃത ട്രാക്കിംഗ് സംവിധാനം സ്ഥാപിക്കുന്നതിനൊപ്പം അധികാരികൾ നിർദേശിക്കുന്ന മറ്റ് നിബന്ധനകളും കമ്പനികൾ പാലിക്കണം.
വാടക വാഹനങ്ങൾ നിരീക്ഷിക്കാൻ ഏകീകൃത സംവിധാനം
വാടക കമ്പനികളുടെ വാഹനങ്ങൾ രജിസ്റ്റർ ചെയ്യാനും അവ പ്രവർത്തിക്കുന്ന മേഖലകൾ നിരീക്ഷിക്കാനും വാടക ഇടപാടുകളുമായി ബന്ധപ്പെട്ട വിവരങ്ങൾ രേഖപ്പെടുത്താനും ആഭ്യന്തര മന്ത്രാലയം പ്രത്യേക ഇലക്ട്രോണിക് സംവിധാനം ഒരുക്കും. വാഹനം വാടകയ്ക്ക് നൽകുന്നതിന് മുമ്പ് ഉപഭോക്താവിന് സാധുവായ ഡ്രൈവിംഗ് ലൈസൻസ് ഉണ്ടെന്ന് കമ്പനികൾ ഉറപ്പാക്കണം. ലൈസൻസിംഗ് അതോറിറ്റി അംഗീകരിച്ച സംവിധാനത്തിലുള്ള സ്റ്റാൻഡേർഡ് വാടക കരാർ ഉപയോഗിച്ചായിരിക്കണം എല്ലാ ഇടപാടുകളും നടത്തേണ്ടത്. കരാറുകൾ ബന്ധപ്പെട്ട അതോറിറ്റിയുടെ അംഗീകൃത ഇലക്ട്രോണിക് സംവിധാനത്തിലൂടെ രജിസ്റ്റർ ചെയ്യുകയും വേണം. സ്വന്തം പേരിൽ രജിസ്റ്റർ ചെയ്തതും വാടകയ്ക്ക് നൽകാൻ ഔദ്യോഗിക അനുമതിയുള്ളതുമായ വാഹനങ്ങൾ മാത്രമേ കമ്പനികൾക്ക് ഉപയോഗിക്കാനാകൂ.
മറ്റ് വാടക കമ്പനികൾക്ക് വാഹനങ്ങൾ കൈമാറുന്നതിന് നിയന്ത്രണം
ലൈസൻസിംഗ് അതോറിറ്റിയിൽ രജിസ്റ്റർ ചെയ്ത വാടക കരാറിന്റെ പരിധിയിൽ വരാത്തപക്ഷം ഒരു വാടക കമ്പനിക്ക് മറ്റൊരു വാടക ബിസിനസിന് വാഹനങ്ങൾ വായ്പയായി നൽകാനോ കൈമാറാനോ അനുവാദമുണ്ടാകില്ല. എന്നാൽ, ഒരേ വാടക കമ്പനിയിലെ ജീവനക്കാർ വാഹനങ്ങൾ ഉപയോഗിക്കുന്നതിന് ഇളവ് അനുവദിച്ചിട്ടുണ്ട്. ഇതിന് ബന്ധപ്പെട്ട ലൈസൻസിംഗ് അതോറിറ്റി നിശ്ചയിക്കുന്ന നിബന്ധനകളും നിയന്ത്രണങ്ങളും പാലിക്കണം. വാടക വാഹനങ്ങളുടെ പ്രവർത്തനം കൂടുതൽ കാര്യക്ഷമമായി നിരീക്ഷിക്കാനും മേഖലയിൽ നിയന്ത്രണവും ഉത്തരവാദിത്തവും ഉറപ്പാക്കാനുമാണ് പുതിയ നിയമങ്ങൾ ലക്ഷ്യമിടുന്നത്.
No comments:
Post a Comment