visaprocessUAE: മനം കവരുന്ന കാഴ്‌ചകളുമായ് ശുവൈഹത്ത് ദ്വീപ്

അബുദാബി:കാഴ്‌ചകളുടെ കലവറയാണ് ശുവൈഹത്ത്‌ ദ്വീപ്. അബുദാബിയിൽനിന്ന് സൗദി അറേബ്യയിലേക്ക് പോകുന്ന വഴിയിൽ അതിർത്തിപ്രദേശത്താണ് ഈ ദ്വീപ്. അധികമാരും ഈ ദ്വീപിലേക്ക് വരാറില്ല. നീണ്ട യാത്രയ്ക്ക് ക്ഷമയുള്ളവർക്കാകട്ടെ ഈ ദ്വീപ് മനംകവരുന്ന കാഴ്ചകൾ സമ്മാനിക്കാറുമുണ്ട്. ദുബായിയിൽ നിന്ന് നാല് മണിക്കൂർ ഡ്രൈവ് ചെയ്യണം ശുവൈഹത്ത് ഐലൻഡിൽ എത്താൻ.

യു.എ.ഇ.സായുധസേനയുടെ ക്യാമ്പിന് സമീപത്തുകൂടിയാണ് ദ്വീപിലേക്ക് കടക്കേണ്ടത്. പൂഴിമണ്ണ് പുതച്ച റോഡിലൂടെ സൂക്ഷിച്ചുവേണം യാത്ര. മൺപാത കുറച്ച് പിന്നിടുമ്പോൾ കടലിനപ്പുറത്ത് കാണാം സഞ്ചരികളെയും കാത്തിരിക്കുന്ന ശുവൈഹത്ത് ദ്വീപ്.

ദ്വീപിലേക്ക് കടക്കുമ്പോൾ ആദ്യം ഉയർന്ന പാറക്കല്ലുകൾ കാണാം. അത് പിന്നിട്ടുപോയാൽ പിന്നെ കടൽത്തീരത്തെത്താം. ഇവിടെ കടലിനു മറ്റൊരഴകാണ്. ആർത്തലച്ചുവരുന്ന തിരമാലയില്ല. കുഞ്ഞോളങ്ങൾ മാത്രം. തെളിഞ്ഞവെള്ളം. തീരത്ത് അധികം ആഴമില്ല. കടലിലോട്ട് പോകുമ്പോൾ പെട്ടെന്ന് ആഴം കൂടിവരുന്ന അവസ്ഥയുമില്ല. സധൈര്യം കടലിൽ ഇറങ്ങാം. ആർത്തുല്ലസിക്കാം. യൂറോപ്യൻ കടൽത്തീരങ്ങളെ ഓർമിപ്പിക്കുന്നു ശുവൈഹത്ത്‌ ഐലൻഡിലെ ഈ നീലക്കടൽ.

കടലിൽ ഇറങ്ങിയാലും നിറയെ കാഴ്‌ചകളാണ്. അങ്ങകലെ ചെറുദ്വീപുകൾ വേറെയും കാണാം. കരയിലേക്ക് നോക്കിയാൽ ഉയർന്ന പാറക്കെട്ടുകളും. പാറകൾ ഏതുനിമിഷവും കടലിലേക്ക് വീഴും എന്നരീതിയിൽ ചെങ്കുത്തായിത്തന്നെ നിൽക്കുന്നു. കടലും പാറക്കെട്ടുകളും മരുഭൂമിയും ഒരുപോലെ ആസ്വദിക്കാൻ കഴിയുന്ന യു.എ.ഇ.യിലെ അപൂർവസ്ഥലങ്ങളിൽ ഒന്നാണ് ഈ ദ്വീപ്. സൈന്യത്തിന്റെ നിയന്ത്രണത്തിലുള്ള സ്ഥലമാണിത്. അതുകൊണ്ടുതന്നെ ഇതൊരു ഔദ്യോഗിക വിനോദസഞ്ചാര കേന്ദ്രവുമല്ല. പക്ഷേ ആളുകൾ വരുന്നത് സൈന്യം തടയാറില്ല. ഇവിടെ രാത്രി താമസിക്കരുത് എന്നാണ് നിയമം .പക്ഷേ യുവാക്കൾ ടെൻഡ്‌ കെട്ടി താമസിക്കാറുണ്ട് . വലിയ ഉപദ്രവമല്ലാത്തതുകൊണ്ട് അധികൃതർ കർശന നടപടി എടുക്കാറുമില്ല. കടലിൽ ആർത്ത് ഉല്ലസിക്കാനും കരയിൽ ബാർബിക്യൂ തയ്യാറാക്കാനും വാരാന്ത്യങ്ങളിൽ നല്ല തിരക്കാണ്.

കുടുംബത്തോടൊപ്പം ഒരു ദീർഘയാത്ര ആസ്വദിക്കണമെങ്കിൽ ശുവൈഹത്തിലേക്ക് വന്നാൽമതി. ഈ ദ്വീപിലേക്കുള്ള യാത്രയ്ക്ക് മുന്പ് ചില മുൻകരുതലുകൾ നല്ലതാണ് . റുവൈസ് കഴിഞ്ഞാൽ പിന്നെ റസ്റ്ററന്റുകൾ ഇല്ല. അതിനാൽ റുവൈസിൽനിന്ന് ആവശ്യമുള്ള ഭക്ഷണസാധനങ്ങൾ വാങ്ങി സൂക്ഷിക്കണം. പെട്രോൾ സ്‌റ്റേഷന്റെ അവസ്ഥയും അതുതന്നെ. കുടുംബങ്ങളുടെ യാത്രയിൽ കൂടുതൽ അംഗബലം പൊതുവേ നല്ലതാണ്.

അപൂർവ ജീവജാലങ്ങളുടെ ആവാസകേന്ദ്രം കൂടിയാണ് ഈ പ്രദേശം. കടലിനോടുചേർന്ന പാറക്കെട്ടുകളുടെ ഭംഗി എടുത്തുപറയേണ്ടതാണ്. ദ്വീപിന്റെ സ്വാഭാവികത നിലനിർത്താൻ ശുവൈഹത്തിലേക്ക് വന്നു മടങ്ങുന്നവർ പ്ലാസ്റ്റിക് ഉൾപ്പെടെയുള്ളവ ഉപേക്ഷിക്കാതിരിക്കാൻ ശ്രദ്ധിക്കണം. തണുപ്പുകാലത്താണ് ഇവിടെ കൂടുതൽ ആളുകൾ വന്നുപോകുന്നത്. read more